“Anëtarësimi i Kosovës në BE nuk vjen në diskutim për ne sikurse s’vjen as edhe liberalizimi i vizave për kosovarët”, kështu ka deklaruar eurodeputeti austriak Harald Vilimsky.

Këtë deklaratë ai e bëri duke marrë për arsye edhe publikimin e një raporti të Komitetit për Çështje të Jashtme të Parlamentit Europian (AFET) për gatishmërinë e perspektivës për vendet e Ballkanit Perëndimor.

“Edhe raporti i AFET thotë se Kosova duhet të shtojë përpjekjet e saj për të luftuar korrupsionin dhe krimin e organizuar. Kjo është një mënyrë e sjellshme për të thënë që ky vend karakterizohet ende nga struktura mafioze dhe është një bastion për krimin e organizuar, trafikimin e drogës dhe organeve. Kriminelët dhe terroristët grumbullojnë armë të paligjshme atje. Liberalizimi i vizave do të inkurajonte vetëm zgjerimin e mëtejshëm të biznesit të kriminelëve në BE”, ka thënë Vilimsky, shkruan gazeta austriake APA, njofton Klan Kosova.

“Austriakët po nxitën që të besojnë se ka mundësi për stabilitet, por Kosova është një shtet i dështuar që nuk ka vend në BE. Situata në rajonin kufitar me Maqedoninë e Veriut dhe situata e pakicës serbe në veri të Kosovës janë më shumë se të pasigurta dhe mund të bëjnë që situata të shpërthejë përsëri në Ballkan. Kjo mund të çojë në konflikte të mëtejshme të përfaqësuesve, veçanërisht në Austri. Për ne, siguria e austriakëve është më e rëndësishme sesa pranimi i një shteti të dështuar dhe mafioz si Kosova në BE”.